Para kay Nancy Odiamar, 56 taong gulang at benepisyaryo ng Pantawid Pamilyang Pilipino Program (4Ps) mula sa Brgy. Calalahan, San Jose, Camarines Sur, kailanman ay hindi naging madali ang buhay. Walang natapos na kolehiyo at simple lamang ang kabuhayan, pakiramdam niya’y para silang umaakyat sa bundok nang walang sapin sa paa habang binubuhay ang anim na anak. Lalo pang pinahirap ng sitwasyon ang kapansanan sa pandinig ng kanyang asawa, dahilan upang maging mas mabigat ang kanilang araw-araw na pakikibaka.

Ngunit kung may isang bagay na kailanman ay hindi nawala sa mag-asawa, iyon ay pag-asa. Buo ang paniniwala nila na sa pamamagitan ng sipag, tiyaga, at pagkakaisa, makakamtan ng kanilang mga anak ang mas maliwanag na kinabukasan. Ang paniniwalang iyon ang nagsilbing ilaw sa pinakamadilim nilang mga araw—mga panahong kapos sa pagkain, tambak ang bayarin, at tila mailap ang mga pangarap.

Nagsimulang magbago ang kanilang buhay nang mapasama sila sa 4Ps. Para kay Nanay Nancy, ang buwanang Family Development Sessions (FDS) ay hindi lamang simpleng pagpupulong, kundi mga aral sa pamumuhay at pagbangon. Natutunan niya ang tungkol sa tamang paggastos, kalusugan, at kung paano mamahala ng tahanan nang may katatagan.

Lumaking saksi ang mga anak sa sakripisyo ng kanilang mga magulang, at iyon ang nagsilbing puhunan nila sa tagumpay. Si Jade, ang panganay na anak, ay nakakuha ng Expanded Students’ Grants-in-Aid Program for Poverty Alleviation (ESGPPA) scholarship, nagtapos sa kursong Electrical Technology, at ngayon ay nagtatrabaho sa Suzuki Company sa Hungary. Si Ruth, ang ikaapat na anak, ay nakamit din ang pangarap na makapagtapos ng Information Technology at may maayos na trabaho sa Laguna. Dahil sa kanilang tagumpay, nabigyang daan ang pag-aaral ng kanilang mga kapatid. Si Lea Mae, na nasa ikalawang taon sa kolehiyo, at si Hanna Mae, na kasalukuyang senior high school student. Ngayon, sina Jade at Ruth na mismo ang tumutulong sa gastusin ng pamilya upang matiyak na makakapagtapos din ang kanilang mga kapatid.

Sa paglingon ni Nancy sa kanilang pinagdaanan, hindi niya mapigilang mapaluha sa pasasalamat. Ang dating buhay na puno ng pangamba ay napalitan ng buhay na puno ng pag-asa.

Buong puso niyang ibinahagi, “Bilang dating 4Ps grantee, ang maipapayo ko sa mga pamilyang dumaraan sa hirap ay simple lang: huwag mawalan ng pag-asa. Magtulungan, magtiyaga sa mga pagsubok, at pahalagahan ang mga oportunidad na ibinibigay sa inyo. Gamitin nang tama ang tulong pinansyal, at laging magtiwala sa Diyos. Sa tamang panahon, Siya ang magbibigay.”

Ang kuwento ng Pamilyang Odiamar ay patunay na ang kahirapan ay hindi katapusan. Sa pamamagitan ng pagsisikap, pagkakaisa, at mga programang tulad ng 4Ps, kayang makaahon ng bawat pamilya at maabot ang buhay na dati’y pangarap lamang.